久保田竜彦 (18/6/06)

久保田竜彦，日本小朋友，8歲，曾在香港居住．最近與家人返回日本東京長駐．很巧合在美孚單車場認識這位日籍小師弟．久保田的爸爸曾經被日本總公司調派來香港工作．在港期間，久保田的爸爸經常帶他到美孚練習BMX．一輛BMX單車將兩個不同年代，不同國籍，不同語言，不同背景的人拉近．大家為保持這段奇妙的友誼，眾BMX弟兄姊妹現準備寄一件 T-Shirt 去日本俾久保田小師弟．香港BMX界唯一的女車手Nikki，又稱「小師妹」，正在T-Shirt上簽名．各位觀眾，呢D咪係叫做「物輕情義重」囉．

1.2億跳老舞 (14/6/06)

如果要花1.2億港元去追求一種個人嗜好「跳拉丁舞」是否值得呢？真是見仁見智．匯豐私人銀行亞洲區行政總裁Monica Wong的遭遇，是一種痛苦！錯不在她對跳舞的熱誠或執著，錯在她信錯一個衰男人，這個所謂過氣的拉丁舞王Mirko Saccani是一個正宗騙財的洋鬼子．他竟然夠薑以教舞為名，騙財為實去呃銀行大姐大．這樣的洋鬼子在香港多得是．呢班洋鬼子乜春野都扮晒至勁！查實我話「米高積遜」的 MoonWalk 最勁！凡以金錢買回來的剎那快樂都不會是永恆的！相信條死鬼佬今期俾人告，佢一定著草走佬．六千幾萬港幣呀！大佬！唔係冥通銀行的陰司紙呀......你叫佢點賠呀？

波係圓 (11/6/06)

四年一度的世界盃足球比賽又來了！大家都希望自己喜愛的球隊能勝出．但世事難料，你心想的，通常事與願違．不過今次輸了波，只要不棄屢，四年後又可以捲土重來．其實人生亦如此．回想起十年前，僥倖考進一間外資金融機構打工．初出茅廬，又低做起．跟自己同期出身的同學和同事，現時都在金融界上晒位，不是乜乜高級經理，就是乜乜副總裁或部門主管．只剩下自己原地踏步，是什麼令自己堅持下去做一個小薯仔？常問自己到底欠了什麼？是否打扮老土，不善交際，不懂搽鞋，不識時務等等...... 其實可能只是欠了一個機會！因我相信「波係圓」的道理．

工作多年，雖然職位和收入低微，但總算餓唔死，當中也有另一番體會．在這些年間，甚麼人幫過小弟，我心中有數，一切盡在不言中！所有幫過我的人，支持過我的家人朋友，我一定會記得．等著瞧，有朝一日，小弟一定可以一腳射穿個龍門俾大家睇的！

阿叔，你有壓力，你做咩挑釁我呀? (28/5/06)

近期最Hit 的「巴士阿叔狂吊四眼哥仔事件」的短片在網上流傳，現今已超過2百萬人收看．引起了全香港市民激烈討論．

每個人晌社會上都有壓力！「我有壓力，你有壓力，你做乜X野挑釁我呀？」．勢估唔到「巴士阿叔」將自己的壓力發洩在呢位茄呢的四眼哥仔身上．巴士阿叔用狂怒的粗言問候四眼哥仔的娘親．不過呢個四眼哥仔都算好野，可以對住兇神惡煞的巴士阿叔還面不改容，以犧牲自己老母的名節，並以「君子動口不動手」去解決一場浩劫，這實在令人嘆為觀止！

「巴士阿叔事件」其實反映出香港人悲哀的一面．有人竟然在車廂裡大吵大鬧，行為如同黑社會成員般無法無天，而其他的旁觀者卻麻木不仁，袖手旁觀．以為唔關自己事就唔理，唔幫拖．呢個係咩世界？！

巴士阿叔，家陣本人代表四眼哥仔話你知：呢單野其實「未解決，未解決，未解決！」「有緣我地會再見，或者會碰頭！」 到時你條死粗口阿叔要向全香港市民道歉！http://www.youtube.com/watch?v=H20dhY01Xjk

醉酒駕駛 = 謀殺 (24/5/06)

最近又發生一單醉酒駕駛撞死一名的士司機及一名無辜少女．涉嫌醉酒駕駛名貴跑車的人士，撞死兩條人命都只須要用港幣伍千元就可保釋外出．根據現時香港法律, 醉酒駕駛撞死他人，最高懲罰都只係二萬五港元 及監禁三年．本人認為懲罰太輕，因為醉酒駕駛 等於 謀殺！為遏制日益嚴重的醉酒駕駛罪行，我覺得政府必須立法把所有因醉酒駕駛造成無辜者死亡的司機判處死刑，佢地咁鍾意醉酒，最公平的做法是先灌他/她飲酒，係飲「工業火酒」．然後連人帶車一齊用猛火燒毀去陪葬，才可有效阻嚇醉酒駕駛人士！

食．西．餐 (20/5/06)

昨晚八點前，提早收工，事關約了兩位靚女舊同事去銅鑼灣食晚餐．冇見兩位女同事一段時間，以前的黃毛丫頭，搖身一變，現今已成為金融界的天之嬌女，家陣真係又靚身材又Fit．兩位有時尚品味的中環麗人深知我這個大鄉里對美食的見識淺陋，特登帶小弟去一間「日式西餐廳」共享晚餐．呢間日式西餐廳叫UCC Vienna Cafe，位於銅鑼灣 禮頓道33-35號地下．一套晚餐有：忌廉南瓜湯，自助沙律，一杯飲品再加一碟蛋包番茄汁帶子海鮮飯．好好味呀！雖然在場有幾位女侍應都青春貌美．但相比之下，當然都不及兩位舊女同事嗦啦！皆因味覺和視覺同樣重要．蔡瀾話齋：「有靚女陪食飯，真係一樂也！」